ເສດຖະກິດຝືດ ອະສັງຫາລິມະຊັບຫົດຕົວ ຜູ້ມີລາຍຮັບປານກາງໃຊ້ຈ່າຍຢ່າງລະວັງ

ນັບແຕ່ທ້າຍປີ 2016 ກ້າວສູ່ປີ 2017 ສັນຍານເສດຖະກິດໂລກມີການຫົດຕົວລົງ, ສະພາບການແຂ່ງຂັນທາງການຄ້າເລີ່ມດຸເດືອດຫຼາຍຂຶ້ນ ສົ່ງຜົນກະທົບໄປທົ່ວໂລກ; ປະເທດທີ່ມີເສດຖະກິດຂະໜາດນ້ອຍກໍ່ປາສະຈາກບໍ່ໄດ້ທີ່ຈະຮັບຜົນກະທົບ ລວມທັງ ສປປ ລາວ ໂດຍສັງເກດງ່າຍໆຈາກອະສັງຫາລິມະຊັບບໍ່ມີການຂະຫຍາຍຕົວເທົ່າທີ່ຄວນ ເຖິງແມ່ນວ່າເຈົ້າຂອງອະສັງຫາລິມະຊັບຈະມີ ຄວາມພະຍາຍາມສ້າງກິດຈະກຳສົ່ງເສີມການຂາຍທີ່ຫຼາກຫຼາຍ ແຕ່ກໍ່ຍັງບໍ່ເຮັດໃຫ້ບັນລຸເປົ້າໝາຍໄດ້.

ນັກທຸລະກິດຍິງເຈົ້າຂອງອະສັງຫາລິມະຊັບແຫ່ງໜຶ່ງໃນນະຄອນຫຼວງວຽງຈັນ ບໍ່ປະສົງອອກນາມໃຫ້ ສຳພາດວ່າ: ໄລຍະ 2 ປີຜ່ານມາ ສັງເກດເຫັນວ່າທຸລະກິດດ້ານອະສັງຫາລິມະຊັບຍັງຂະຫຍາຍຕົວບໍ່ໄດ້ດີເທົ່າທີ່ຄວນ ເຖິງແມ່ນວ່າຜູ້ປະກອບການເອງຈະມີຄວາມພະຍາຍາມເຮັດທຸກວິທີທາງໃນການຂາຍເພື່ອດຶງດູດຄວາມສົນໃຈໃຫ້ກັບລູກຄ້າ ເຊັ່ນ: ດອກເບ້ຍຕ່ຳ, ຜ່ອນໄລຍະຍາວ, ຊື້ແບບມີສ່ວນຫຼຸດຢ່າງຫຼວງຫຼາຍ.

ນັກວິເຄາະເສດຖະສາດຫຼາຍທ່ານຄາດຄະເນວ່າ: ຈາກການເຂົ້າມາຊອກວຽກເຮັດງານທຳຂອງປະຊາຊົນທີ່ຢູ່ຕ່າງແຂວງ ແລະ ຢູ່ນອກຕົວເມືອງຈະເຮັດໃຫ້ທຸລະກິດຂະແໜງອະສັງຫາລິມະຊັບເພີ່ມຂຶ້ນ ໂດຍສະເພາະຜູ້ມີລາຍຮັບປານກາງທີ່ເຂົ້າມາຢູ່ດົນ ແລະ ພໍມີເງິນເກັບກໍ່ຕ້ອງຄິດຫາການຜ່ອນທີ່ດິນ, ຜ່ອນເຮືອນເພື່ອເປັນຂອງຕົວເອງ.

ການຄາດຄະເນຂອງນັກເສດຖະສາດອາດບໍ່ຖືກຕ້ອງ 100% ເພາະມີພຽງແຕ່ຂະແໜງເຮືອນພັກ, ຫ້ອງແຖວ, ອາພາດເມັນໃຫ້ເຊົ່າແບບຊົ່ວຄາວ ຫຼື ປີຕໍ່ປີເທົ່ານັ້ນທີ່ເຫັນວ່າມີການຂະຫຍາຍຕົວ ເພາະຄົນຕ່າງແຂວງ ຫຼື ນັກທຸລະກິດຕ່າງປະເທດທີ່ເຂົ້າມາລົງທຶນບໍ່ມີສິດເລືອກ ເພາະທີ່ຢູ່ອາໄສແມ່ນສິ່ງທີ່ຈຳເປັນສຳລັບພວກເຂົາເທົ່ານັ້ນ, ສະເພາະຄົນຕ່າງແຂວງທີ່ເຂົ້າມາເຮັດວຽກໃນເມືອງໃຫຍ່ ຜູ້ທີ່ມີລາຍຮັບປານກາງກໍ່ຕ້ອງໄດ້ມີການໃຊ້ຈ່າຍແບບປະຢັດ ບາງເດືອນກໍ່ພໍດີກັບລາຍຈ່າຍກໍ່ຕ້ອງໄດ້ສູ້ຊົນຊອກລາຍຮັບອື່ນເຂົ້າມາເພີ່ມໃນເດືອນຕໍ່ໄປ.

ຍຸກເສດຖະກິດຝືດ – ຄ່າຄອງຊີບຖີບຕົວສູງຂຶ້ນ
ຜູ້ມີລາຍຮັບປານກາງບໍ່ມີເງິນອອມຫຼາຍ ສົ່ງຜົນໃຫ້ທຸລະກິດບ້ານໃນຝັນ ແລະ ອີກຫຼາຍໂຄງການທີ່ກໍ່ສ້າງເຮືອນຂາຍ, ແບ່ງດິນຂາຍ, ກໍາມະສິດນໍາໃຊ້ທີ່ດິນບໍ່ໄດ້ຮັບຄວາມນິຍົມສູງເທົ່າທີ່ຄວນ; ບາງໂຄງການສ້າງຂຶ້ນມາແລ້ວກໍ່ຕ້ອງໄດ້ຢຸດຊົ່ວຄາວເພື່ອປະເມີນທິດທາງຫາວິທີໄປຕໍ່ ເພາະສັນຊາດຕະຍານຂອງນັກທຸລະກິດແມ່ນຈະບໍ່ປະເງິນທີ່ລົງທຶນໄປນອນໄວ້ດົນ ຍົກເວັ້ນການຊື້ຕຶກ, ອາຄານ ຫຼື ທີ່ດິນ ຖ້າປະໄວ້ດົນຍ່ອມມີເຫດ ແລະ ຜົນສະເໝີ.ທ່ານ ຫຸມພັນ ໄຊຍະລາດ ເຈົ້າຂອງ ບໍລິສັດ ຊື້ – ຂາຍດິນ – ເຮືອນ ກ່າວວ່າ: ທິດທາງອະສັງຫາລິມະຊັບແຕ່ປີນີ້ໄປຈົນໝົດປີ 2019 ອາດຈະຍັງບໍ່ທັນມີການຂະຫຍາຍຕົວສູງເທົ່າທີ່ຄວນ ເບິ່ງຈາກສະພາບເສດຖະກິດໂລກທີ່ມີການຂະຫຍາຍຕົວຊ້າລົງ, ສິ່ງທີ່ໜ້າຍິນດີແມ່ນການປັບຂຶ້ນເງິນເດືອນຂັ້ນພື້ນຖານຂອງພະນັກງານຈາກ 9 ແສນກີບ ມາເປັນ 1,1 ແສນກີບ ຈະສົ່ງຜົນດີ ແຕ່ຖ້າຫາກຄວບຄຸມລາຄາສິນຄ້າທີ່ຈຳເປັນຕາມທ້ອງຕະຫຼາດບໍ່ໄດ້ ການຂຶ້ນເງິນເດືອນຄັ້ງນີ້ກໍ່ບໍ່ໄດ້ຮັບປະສິດທິຜົນ ອະສັງຫາລິມະຊັບຈະມີການພົວພັນກັບຫຼາຍຂະແໜງການທີ່ສະໜັບສະໜູນໃຫ້ມີການລົງທຶນ, ແຜນພັດທະນາຂອງລັດຖະບານ ລວມທັງການສ້າງລາຍຮັບຕ່າງໆ ເພາະບຸກຄົນຈະມີເງິນມາຜ່ອນ ຫຼື ເປັນເຈົ້າຂອງທີ່ດິນກໍ່ຕ້ອງໄດ້ອາໄສເງິນຈາກສ່ວນເກີນຂອງລາຍຈ່າຍທີ່ຈຳເປັນໃນແຕ່ລະເດືອນ.ປັດຈຸບັນສັງເກດເຫັນວ່າລຽບສາຍທາງທີ່ມີແຜນການພັດທະນາຂອງລັດຖະບານຈະເຫັນການຕິດປ້າຍຂາຍກໍາມະສິດນໍາໃຊ້ທີ່ດິນ, ຜ່ອນກໍາມະສິດທີ່ດິນຢູ່ຫຼາຍເຂດ ແລະ ມີຫຼາຍຂໍ້ສະເໜີທີ່ເປັນເງື່ອນໄຂດຶງດູດຄວາມສົນໃຈລູກຄ້າ ເຊັ່ນ: ເຂດພັດທະນາຕົວເມືອງໃໝ່ ເສັ້ນທາງດອນໜູນ ເມືອງໄຊທານີ ນະຄອນຫຼວງວຽງຈັນ, ເຂດໜອງແຕ່ງ ເມືອງສີໂຄດຕະບອງ ແລະ ອີກຫຼາຍເຂດ.

ແຫຼ່ງທີ່ມາຈາກ: ເສດຖະກິດການຄ້າ

0Shares

Join The Discussion

Compare listings

Compare